"Martın 11-i bitkoin (BTC) son 3 il ərzində ilk dəfə olaraq 71 min dollarlıq həddi keçərək Binance birjasında 71.658 dollara qədər dəyər qazandı. Hazırda isə bitkoin 1.4 trilyon dollar bazar kapitalizasiyası ilə 71.200 dollar ətrafında ticarət edilir. Bu qiymət ilə BTC ümumi bazar kapitalizasiyasının 52.2%-ni təşkil edir".

Bu sözləri İqtisadiyyat.az-a açıqlamasında "Crypto Consulting" MMC-nin direktoru, UNEC-in Biznes Məktəbinin müəllimi Elnur Quliyev deyib. 

Onun sözlərinə görə, BTC-nin qiymətinin artmasına təsir edən əsas faktorlar aşağıdakılardır:

1) Birja “spot ETF Fond”-larının və korporativ şirkətlərin bitcoin-ə olan kəskin tələbətın yaranması və kriptovalyuta bazarına əlavə kapitalın daxil olması;

2) Aprel ayında gözlənilən “bitcoin halving” hadisəsi. Tarixi statistik məlumatlara əsasən, BTC-nin qiyməti həmişə halvinqdən bir neçə ay əvvəl artmağa başlayıb və sonradan növbəti tarixi maksimum qiymətə qədər yüksəlib;

3) ABŞ Federal Ehtiyatlar Sisteminın (FRS) uçot faiz dərəcəsinin vaxtından əvvəl endirəcəyi ilə bağlı gözləntilərin artması.

Mütəxəssis bildirib ki, texniki analizə əsasən bitkoin yeni “buğa dövrü”nə daxil olur: "Növbəti hədəfin tarixi maksimum qiymət səviyyəsi olan 80.000 dollara qədər artımın hədəflədiyini müşahidə edirik. Lakin hesab edirəm ki, bitkoin yaxın zamanda 75.300 və 77.500 dollarlıq hədəfləri keçməlidir ki, növbəti tarixi maksumum qiymətini yeniləyə bilsin. Bununla belə, qiymətlərin korreksiyasını ("Qara Qu quşu" riski) da müşahidə edə bilərik. Əgər hər hansı bir səbəbdən ciddi qiymət düşməsi baş verərsə, bu zaman güclü dəstək səviyyələri təxminən 55.170 və 50.500 dollar ətrafında olacaqdır".

Qorxu və xəsislik indeksinin (Fear & Greed Index) hazırda 89 səviyyəsində olduğunu deyən ekspert bildirib ki, bu faktor investorlar arasında yüksək səviyyədə alış təzyiqi olduğunu göstərir. E.Quliyevin sözlərinə görə, adətən bu göstərici 90 baldan çox olduqda iri investorlar satış edərək qazanclarını fiksə edirlər. Çünki "həddindən artıq acgözlük" adətən qiymətlərin düşməsi ilə müşayiət olunur.

 

Sadiq Cavadov