Bakı-Quba-Rusiya Federasiyası ilə dövlət sərhədi ödənişli yolunda qəzaların sayı artır. Əksəriyyət baş verən qəzalarda sürücüləri günahlandırsa da, ekspertlər qəzaların əsas səbəbini sürücü məsuliyyətsizliyində görmür.

Nəqliyyat məsələləri üzrə ekspert Eldəniz Cəfərov İqtisadiyyat.az-a açıqlamasında ödənişli yolda baş verən qəzaların əsas səbəbinin sürücü məsuliyyətsizliyi ucbatından baş vermədiyini deyib.

Sürücü məsuliyyətsizliyinə qədər həmin yolda işıqlandırılmanın olmadığını deyən ekspert bildirib ki, bu, sutkanın qaranlıq saatlarında həmin yoldan istifadə edən sürücülər üçün böyük bir təhlükə mənbəyidir.

Onun sözlərinə görə, həmin yolun böyük qismində çəpərlənmə mövcud deyil və bu da çöl heyvanlarının qəfil magistral yola çıxması ilə qəza şəraitinə səbəb olur:

"Həmçinin yol nişanlarının sayı da olduqca azdır. Belə magistral yollarda məlumatverici, xəbərdareci nişanlar həddindən artıq çox olmalıdır ki, sürücülər ən azından sutkanın qaranlıq saatlarında bu nişanları mövqe tutaraq hərəkət edə bilsinlər. Ümumilikdə, çox təəssüf ki, Azərbaycanda yol infrastrukturu ilə bağlı problemlər çoxdur. Məsələn, Bakıda o qədər lyuk çuxurları var ki, burada avtomobil idarə etmək, düz xətlə, bir zolaqla hərəkət etmək qeyri-mümkündür. Mənə elə gəlir ki, dünyada bu qədər çala-çuxur olan ikinci belə paytaxt şəhəri yoxdur. Yəni biz hələ heç paytaxtımızda normal yol infrastrukturunu qura bilməmişik. Ona görə də bölgələrarası yolların bu cür olması məni təəccübləndirmir".

Azərbaycanda magistral yolda maksimal sürət həddinin saaatda 110 km olduğunu xatırladan ekspert bildirib ki, ödənişli yolda maksimal sürəti göstərən hər hansı bir nişan yoxdur: 

"Tez-tez qeyd olunur ki, həmin yolda magistral yol nişanı var. Amma bu o demək deyil ki, sürücü avtomobilini orada maksimal sürətlə idarə etməyəcək. Sürücü əgər saatda 120 km sürətlə hərəkət edirsə, Dövlət Yol Patrul xidmətinin əməkdaşı nəyə əsasən sürücünü cərimələyə bilər? Magistral yol nişanı buna əsas vermir". 

Ödənişli yolda maksimal sürət həddinin qoyulmasının tərəfdarı olmayan ekspertin sözlərinə görə, bu yolu təhlükəsiz etmək lazımdır ki, burada avtomobil sürətlə hərəkət edəndə hər hansı problem yaranmasın: "Həmçinin o yolda hər hansı bir təmir və ilk tibbi yardım məntəqəsi də mövcud deyil. Ona görə də həmin yolda hər bir məsələdə sürücüləri günahlandırmağın tərəfdarı deyiləm".

Sadiq Cavadov