Logo

Azərbaycan bankının mənfəəti 16 dəfə artıb - MALİYYƏ VƏZİYYƏTİNİ AÇIQLADI


“Rabitəbank”ın faiz gəlirlərinin artması, eyni zamanda xərclərinin azalması, ehtimal olunan kredit və depozit itkiləri üçün yaradılan ehtiyata 2 dəfə az vəsait ayırması ilə əlaqədar olaraq xalis mənfəəti kəskin artıb. Bankın müştərilərə verdiyi kreditlərin artması faiz gəlirlərinin artmasını təmin edir. 

“Rabitəbank” ASC 2019-cu ilin 9 ayını (yanvar-sentyabr) dövrünü 7 milyon 621 min manat xalis mənfəət ilə başa vurub. Bu, ötən ilin eyni dövrü ilə müqayisədə 16 dəfə çoxdur. “Rabitəbank” 2018-ci ilin 9  ayını 476 min manat xalis mənfəət ilə bağlamışdı.

“Marja” Bankın rüblük hesabatına istinadən xəbər verir ki, cari ilin yanvar - sentyabr dövründə “Rabitəbank”ın cəmi gəlirləri 38 milyon 159 min manat, cəmi xərcləri 27 milyon 639 min manat təşkil edib. Gəlirlər xərcləri üstələdiyindən yaranmış 10 milyon 519 min manat əməliyyat mənfəətinin 2 milyon 898 min manatı ehtimal olunan kredit və depozit itkiləri üçün yaradılan ehtiyata ayırılıb və mənfəət 7 milyon 621 min manata düşüb. Bank 9 ayda mənfəət vergisi ödəməyib. Beləliklə, “Rabitəbank” ASC 2019-cu ilin 9 ayını (yanvar-sentyabr) dövrünü 7 milyon 621 min manat xalis mənfəət ilə başa vurub

Müqayisə üçün qeyd edək ki, 2018-ci ilin yanvar-sentyabr dövründə “Rabitəbank”ın cəmi gəlirləri 33 milyon 375 min manat, cəmi xərcləri 27 milyon 4 min manat təşkil etmişdi. Gəlirlər xərcləri üstələdiyindən Bank yaranmış 6 milyon 371 min manat əməliyyat mənfəətinin 5 milyon 895 min manatını ehtimal olunan kredit və depozit itkiləri üçün yaradılan ehtiyata ayırdığından həmin dövrü 476 min manat mənfəət ilə bağlamışdı. Bank həmin dövrdə də mənfəət vergisi ödəməmişdi.

FAİZ GƏLİRLƏRİ ARTIB, QEYRİ- FAİZ GƏLİRLƏRİ CÜZİ AZALIB

Ötən ilin 9 ayında 26 milyon 175 min manat təşkil etmiş faiz gəlirləri bu ilin 9 ayında 30 milyon 999 min manat, keçən ilin yanvar-sentyabr dövründə 7 milyon 198 min manat təşkil etmiş qeyri-faiz gəlirləri cari ilin eyni dövründə 7 milyon 159 min manat təşkil edib.

FAİZ XƏRCLƏRİ AZALIB, QEYRİ-FAİZ XƏRCLƏRİ ARTIB

Ötən ilin 9 ayında 10 milyon 111 min manat təşkil etmiş faiz xərcləri, bu ilin 9 ayında 7 milyon 885 min manat, keçən ilin yanvar-sentyabr dövründə 16 milyon 893 min manat təşkil etmiş qeyri-faiz xərcləri 2019-cu ilin eyni dövründə 19 milyon 754 min manat təşkil edib.

MÜŞTƏRİLƏRƏ VERİLƏN KREDİTLƏR ARTIB

31 Dekabr 2018-ci il tarixində “Rabitəbank” 772 milyon 113 min manat cəmi aktivlərə, o cümlədən 317 milyon 765 min manat kredit portfelinə malik idi. 30 Sentyabr 2019-cu il tarixində Bankın aktivləri 653 milyon 732 min manat, o cümlədən kredit portfeli 365 milyon 488 min manat  təşkil edib.

Bank,
28.10.2019 13:16 22
Teqlər: İqtisadiyyat.Az, bank,