Azərbaycan regional və qlobal miqyasda aparıcı faktora çevrilib - RƏY

11 aprel 2025, 20:26

ADA Universitetində Prezident İlham Əliyevin iştirakı ilə “Yeni dünya nizamına doğru” mövzusunda keçirilən beynəlxalq forum olduqca önəmli idi. Ölkəmizin başçısı Forumda çıxış edərək vacib mesajlar səsləndirib. Həmçinin Ona ünvanlanan müxtəlif səpgili suallara dolğun və əhatəli cavablar verməklə Azərbaycan-Ermənistan, sülh prosesi, regional və qlobal miqyasda baş verən hadisələri dolğun şəkildə cavablandırıb. Sözsüz ki, beynəlxalq siyasətin müzakirəsinə həsr olunan bu tədbirin yeddinci dəfədir keçirilməsi böyük maraqla qarşılanır. Ötən illərdə 60 ölkədən 200-dən artıq ekspert və alim Bakıda və azad edilmiş Qarabağın dörd şəhərində keçirilmiş müzakirələrdə iştirak edib. İştirakçılar daha sonra regional və qlobal məsələlərlə bağlı bir çox məqalələrlə çıxış edib ki, bu da ölkəmizlə bağlı əsas həqiqətlərin və Azərbaycan dövlətinin həyata keçirdiyi uğurlu siyasətin beynəlxalq tərənnümündə mühüm önəmə malikdir.