"Bu gün Azərbaycan banklarında depozit yatırımlarının 82 faizi xarici valyutadadır. Təkcə yanvar ayında 300 milyon manatdan çox olan əmanətlər geri çəkilərək, yerli banklarda dollarla depozitə qoyulub".

Bu sözləri İqtisadiyyat.az-a açıqlamasında iqtisadçı-ekspert Razi Abasbəyli deyib.

Onun proqnozlarına görə, yaxın aylarda yerli banklarda manatla depozit yatırımı sıfır səviyyəyə düşə bilər. İqtisadçı deyir ki, bu isə Azərbaycan manatının dəyərini sürətlə azaldır: "Nəticədə xarici valyutalar qarşısında manata olan təzyiqlər artır. Belə hallarda da artıq manatın devalvasiyası məsələsi müzakirəyə çıxarılır".

Manatın devalvasiyası gözlənilirmi?

İqtisadçı vurğulayıb ki, manat real olaraq dəyər itirəcəyi təqdirdə Mərkəzi Bank addımlar atmalıdır: "Hələlik Mərkəzi Bank maliyyə alətləri olaraq yalnız mərhələli şəkildə uçot dərəcələrini azaldır. Mərkəzi Bankın bu strateji planlamasının həm kredit faizlərinin aşağı düşməsinə, həm də depozit yığımının stimullaşdırılmasına səbəb olacağı hesab olunur. Lakin gözlənilən nəticə ortada yoxdur".

R.Abasbəylinin sözlərinə görə, maliyyə hesabatları ilə bağlı statistik məlumatlardan və Mərkəzi Bankın açıqladığı dövri hesabatlardan görünür ki, manatın daxili iqtisadiyyatda, idxal-ixrac əməliyyatlarında iştirakı və təsir imkanları ciddi şəkildə azalıb: "Manatın bu təzyiqlərə nə qədər davam gətirəcəyi və milli valyutanın süni şəkildə qorunub saxlanmasının hansı müddətə qədər davam edəcəyini müəyyən etmək çətindir. Azərbaycan hökuməti qismən də olsa, üzən məzənnə siyasətini tətbiq etməlidir".

Gülşən Şərif